Esquecidos os ventos da nortada bravía
Lixeiras brancas dornas meus soños namorados
Anainanse nas ondas calmos acariñados
No abeiro dos teus ollos,no abeiro da badía
Alén deste teu berce trebón e nordesía
A carón dese teu peito calmanse arrolados
Neses teus nidios ollos meus versos ancorados
Coma nenos durmidos na dozura da ria
Areal dos silencios solpores aloumiños
Ronseis no largacío navegan meus cantares
No mar deses teus ollos alegres velaíños
Recendos marusías neses teus ollos mares
Máxicas singraduras brincadeiros golfiños
Neses teus ollos brisas acougan meus pesares.
No hay comentarios:
Publicar un comentario